BANSALAN, Davao del Sur -- Naukay ang mga molupyo sa Purok 3, Brgy. Marber, human nabangalan ang patay’ng lawas sa usa ka wa mailhing lalaki, alas 6:15 sa sayong kabuntagon Sabado, Agosto 24.

Gibutyag ni Police Major Rodante Varona, hepe sa Bansalan Municipal Police Station, nga gituohang gi-salvage ang biktima ug dili taga didto sa lugar sanglit way bisan usa nga nakaila niini.

Si Varona naghulagway nga itumon ang pamanit sa biktima kinsa gibana-banang nagpangedaron og 20-anyos pataas ug anaa sa mga upat ka tiil ug 11 pulgadang gitas-on.

Nakasul-ob og kolor pula nga t-shirt ang biktima diin gisuwatan og pentel pen sa likod nga “karnaper” ug nakasul-ob og kolor orange nga short pants.

Gitataw ni Varona nga giputos og cellophane ug gibalot og sinina ang ulo sa biktima.

Aduna say samad ang lawas sa biktima nga hayan gikan sa di pa matinong kalibre sa armas.

Dugang sa opisyal nga hayan sa lugar na gipatay ang biktima sanglit adunay mga dugo sa yuta diin kini nagbuy-od.

Gitakdang makig-alayon ang kapulisan sa mga sakop sa Scene of the Crime Operatives alang sa ilang imbestigasyon sa krimen. (Orlando B. Dinoy)