LALAKING gituohang gi-salvage napalgan sa mga alas 4:30 sa kaadlawon sa Sabado, Mayo 28, sa karsada sa Paseo Begonia, Purok 7, Barangay Sacsac, Consolacion, amihanang Sugbo.

Ang biktima dunay mga samad pinusilan sa agtang ug likod sa ulo, gibaatan og duct tape ang nawong ingon man gigapos ang mga kamot.

Duna kiniy mga patik sa nagkadaiyang mga ngan sa mga tawo, gang ingon man t-shirt nga dunay ngan sa fraternity.

Matod ni Police Major Jude Librando Cebrero, hepe sa kapulisan sa Consolacion, nga sa pasiunang imbestigasiyon, mga alas 2:30 sa kaadlawon nakadungog ang mga tawo sa dapit og duha ka mga buto sa pusil.

Nianang mga alas 4:30 sa kaadlawon nakit-an ang lawas sa mga nangagi.

Napalgan sa mga personnel sa Scene of the Crime Operation (Soco) ang usa ka slug ug duha ka mga kabhang kabhang sa bala sa pusil nga wa pa mahibaw-i ang kalibre.

Matod ni Cebrero nga ang lawas gidala sa usa ka funeral parlor alang sa autopsy ug pag-ila sa biktima. (GPL)