GIHUGTAN karon ang pagbantay sa mga awtoridad sa posibleng panimalos sa mga teroristang Dawlah Islamiyah human napatay ang ilang lider sa operasyon sa militar sa Talayan, Maguindanao kaadlawon sa Biyernes, Oktubre 29, 2021.

Naila ang napatay nga si Salahuddin Hassan alyas Kumander Orak, overall Amir sa Dawlah Islamiyah sa Pilipinas, kanhi sakop sa Al-Khobar Terror Group ug usa ka top leader sa Bangsamoro Islamic Freedom Fighters (BIFF).

Patay sab ang asawa niini nga si Jehana Minbida, finance officer sa DI ug sakop sa BIFF.

Sumala kang 6th Infantry (Kampilan) Division Chief ug Joint Task Force Central Commander Major/General Juvymax Uy nga naglusad og law enforcement operation ang tropa sa 1st Mechanized Brigade human makadawat og impormasyon sa kuta ni Hassan sa Sitio Pinaring, Barangay Damablak sa nahisgutang lungsod.

Pagsulod pa lang sa mga sundalo sa balay ni Hassan, gipabuthan na sila sa mga terorista.

Napugos ang Joint Task Force Central, hinungdan sa pagkapatay ni Hassan ug sa iyang asawa.

Narekober sa militar sa balay ni Hassan ang usa ka 5.56mm R4 rifle, bandoliers, mga bala, nagkadaiyang war materials ug mga subersibong dokumento.

Sumala ni 1st Mechanized Brigade Commander Colonel Pedro Balisi nga si Hassan nalambigit sa mga pag-atake sa Mindanao niadtong mga tuig 2007 ug 2015. Kanhi sab siya estudyante ni Kumander Basit Usman ug Malaysian Terrorist nga si Zulkifli "Marwan" Binhir.

Si Hassan sab ang mihulip sa puwesto ni Hatib Hajan Sawadjaan isip pinakataas nga Amir sa DI sa Pilipinas.

Gitumbok sab siyang nalambigit sa insidente sa pagpamomba sa Mindanao sa yunit sa Yellow Bus Line sa Tulunan ug M'lang, North Cotabato. (Edgar E. Fuerzas)