NAKAPLAGAN nga wala nay kinabuhi ang mag-amahan nga naanod sa baha alas 4 sa hapon, niadtong Martes, Septyembre 13, 2022, didto sa probinsya sa Cotabato.

Giila ang mga biktima nga sila Condrado Noa, mag-uuma ug ang iyang anak nga si Jimmy Noa, Grade 5 pupil ug mga nagpuyo sa Barangay Mahongkog, Magpet Cotabato.

Gibutyag ni Cotabato Police Provincial Office Director Colonel Harold Ramos nga samtang nangaryada og sinakong mais ang mga biktima sakay sa ilang kabayo patabok sa sapa sa Barangay Mahongkog, Magpet Cotabato, kalit lang mibul-og ang baha.

Nangaanod sa baha paingon sa Arakan River ang mag-amahan apil ang ilang kabayo.

Milusad dayon og search and rescue operation ang gisakpan sa Municipal Disaster Risk Reduction and Management Office (MDRRMO-Magpet) uban ang mga opisyal sa barangay.

Nakaplagan ang lawas sa mga biktima nga nasangit sa gamot sa kahoy daplin sa sapa sa Purok 6, Sitio Little Baguio, Barangay Meocan, Arakan Valley, North Cotabato.

Hubo na ang mga lawas sa mga biktima nga nakaangkon og daghang mga samad ug bali sa ilang kalawasan.

Nagbangotan ang mga kabanay ug pamilya sa mga biktima sa nahitabo kanila.

Nagpasidaan ang MDRRMO-Magpet sa mga namuyo duol sa sapa og kabukiran nga dili magkompiyansa sa baha ug pagdahili sa yuta, ilabi na nga karon nga nakasinati sa pag-ulan ang nasud nunot sa dili maayo nga lakat sa panahon.