TAGUM CITY -- Pabiling nagpaalim sud sa balay tambalanan ang duha ka mga lalaki kinsa gipamusil sa wa mailhing mga mamumuno alas 2:30 sa hapon niadtong Dominggo, Nobyembre 10, didto sa palengke sa Barangay Magugpo West, ning siyudad.

Mga biktima mao sila Roy Salario dela Cruz, 38, magekero, ug si Rotche Bongabong, 37, pulos nagpuyo sa Barangay Visayan Village.

Sa impormasyon gikan sa journal sa Police Regional Office (PRO)-Davao, nasayran nga nagmaneho si Dela Cruz sa motorsiklo kinsa angkas niini si Bongabong nga giingong gikan sa ilang balay padulong sa palengke.

Dihang anaa na sila sa dapit, kalit silang gitaparan sa mamumuno, kinsa naka-motorsiklo sab, dayon gipamusil ang mga nahisgutan.

Human sa panghitabo, daling mipaturatoy ang mamumuno padung sa wa matino nga dapit.

Dali sab nga gipangdala sa pinakaduol nga ospital ang mga biktima kinsa anaa na sa luwas nga kahimtang.

Blangko pa ang kapulisan sa motibo sa krimen.