DEAD on the spot ang usa ka 29 anyos nga lalaki human gipusil sa iyang igsuon Martes sa hapon, Marso 5, didto sa ilang panimalay sa Sitio Sagal, Barangay Macol, Malita, Davao Occidental.

Ang Malita Municipal Police Station nag-ila sa biktima nga si Joven A. Mariano, usa ka mag-uuma, samtang ang suspek mao ang iyang manghud nga si Jovic Mariano, 18 anyos.

Subay sa inisyal nga imbestigasyon sa Malita MPS nasayran nga nagkalalis ang magsuon sa wala na gibutyag nga rason nga maoy hinungdan sa kapungot sa manghod.

Sa kasuko sa manghod, mikuha kini og pusil, dayon kalit nga gipusil ang iyang maguwang tumong sa ulo nga maoy hinungdan sa hinanaling kamatayon niini.

Human sa pipila ka oras gikan sa insidente, buluntaryo nga mi-ampo ang suspek sa mga barangay opisyal sa ilang lugar ug gidala ang armas nga usa ka kalibre 45 nga pistola.

Balhog karon ang suspek didto sa selda sa Malita MPS kinsa pasakaan og kasong parricide didto sa korte.