CARMEN, North Cotabato -- Dumot sa pamilya ang gilantaw sa mga awtoridad nga motibo sa pagpamanhig patay sa magtiayon alas 2 sa hapon niadtong Huwebes, Mayo 24.

Giila ang mga biktima nga sila Motin Mamolindas, 31, ug iyang asawa nga si Fatima, 30, mga nagpuyo sa Barangay Boliok, Pagalungan, Maguindanao Province.

Sumala kang Maguindanao Police Provincial Office director, Senior Superintendent Edwin Wagan nga sakay ang mga biktima sa motorsiklo gikan sa ilang balay paingon sa Barangay Poblacion, Carmen.

Apan pag-abot sa magtiayon sa Sitio Galay, Barangay Kibayao sa lungsod kalit lang mibutho ang wala mailhing mga armadong lalaki ug gipamusil sila.

Patay gilayon ang mga biktima nga natusak-tusak sa bala sa nagkadaiyang parte sa ilang lawas.

Abtik sab nga miikyas ang mga suspek sa diha nga nagresponde ang mga sakop sa Citizen Armed Forces Geographical Unit ug Barangay Peacekeeping Action Team.

Padayon pa ang imbestigasyon sa kapulisan. (Edgar E. Fuerzas)