NAGPATABANG sa kapulisan ang usa ka pamilya human gisulong sa mga batan-on nga sakop sa gang dihang nagkabikil gumikan sa dula sa basketball niadtong milabay nga semana sa Manggahan, Barangay 76-A, Bucana, dakbayan sa Davao.

Sumala sa blotter sa San Pedro Police Station, nagsugod ang away dihang gipildi sa tulo ka magsuong Gurrea sa “3-on-3” sa basketball ang grupo nila alyas Raymond.

Gumikan kay dili madawat sa grupo ni Raymond ang kapildihan, ilang gihapak og botelya sa softdrinks ang ulo ni alyas Rino hinungdan nga nagkagubot sa lugar.

Pagtuo sa pamilyang Gurrea nga human na ang insidente, apan ala 6:30 niadtong milabay nga gabii, kalit lamang mipakita ang katorse ka mga batan-on duol sa panimalay sa pamilyang Gurrea ug dungan nga gibato og botelya ug bato ang ilang balay hinungdan nga nangahadlok ang mga namuyo.

Nasayran pa nga dunay dalang mga kutsilyo ug ice pick ang mga batan-on dihang gibuhat ang pagpangbato.

Gilayon nga nagpatabang sa kapulisan ang nahisgutang pamilya sa kahadlok nga basi’g dunay mahitabo kanila.

Giaksiyonan dayon sa San Pedro PNP ang insidente pinaagi sa pagpadala og mga personahe sa lugar diin ang maong isyu gihandos na ngadto sa barangay level aron didto sila mahusay.