KIDAPAWAN CITY -- Anaa pa gihapon sa mga evacuation centers sa probinsiya sa Cotabato ang libuan ka mga pamilya nga namakwit human sa sunod-sunod nga linog.

Pinakadaghan sa mga mihikling nga mga molupyo naggikan sa Makilala gisundan sa Tulunan, M'lang, Kidapawan City ug Magpet, North Cotabato.

Adunay mga nanguli na sa ilang mga panimalay apan subling namalik sa evacuation sites gumikan sa pag-igo sa 6.9 magnitude nga linog niadtong Disyembre 15.

Matud ni Adolfo Edullantes nga molupyo sa Barangay Luayon, Makilala nga magsilibrar sila sa Pasko ug Bag-ong tuig sa evacuation center.

Adunay mga dagkong liki sa yuta sa ilang dapit og mga pagdahili sa yuta diin peligro pa sa ilaha nga mobalik gumikan adunay mga aftershock pa nga masinati.

Ang uban nga mga bakwit sa linog wala'y mabalikan nga balay gumikan gikuso-kuso kini sa sunod-sunod nga pagtay-og sa yuta.

Nanghinaot si Adolfo Edullantes nga dili sila pasagdan sa gobyerno og mahatagan pa sa dugang nga tabang.

Nangunay mismo ang provincial government sa Cotabato sa pagpanghatag og hinabang sa mga bakwit ilabina mga pagkaon nga ilang maluto karong Pasko ug Bag-ong tuig.