COTABATO CITY - Misaka pa ang ihap sa mga sibilyan nga mihikling sa gilusad nga surgical strike sa militar batok sa mga terorista sa probinsiya sa Maguindanao.

Sayo palang mga alas 5:15 sa buntag, Hulyo 28, namomba na ang duha ka fighter jet sa Philippine Air Force (PAF) sa SPMS Box.

Muabot na sab sa 217 ka pamilya ang nanghikling gikan sa lungsod sa Shariff Saydona Mustapha, Maguindanao nga sentro sa operasyon sa Joint Task Force Central sa militar.

Target sa surgical strike ang grupo ni Shiek Esmail Abdulmalik, alyas Kumander Abu Toraife, sa Bangsamoro Islamic Freedom Fighters (BIFF-Isis Inspired Group).

Nakig-alayon ang grupo ni Toraife sa mga langyaw nga terorista nga sakop sa Islamic State of Iraq and Syria (Isis).

Muabot na sa 13 ang patay sa BIFF, usa sa sundalo samtang daghanan ang naangol.

Napalibutan na sab sa mga sundalo ang mga rebelde sa Barangay Dasawao, Shariff Saydona Mustapha, Maguindanao.

Nagpaabot na sab og hinabang ang buhatan ni Maguindanao Governor Bai Mariam Sangki Mangudadatu ngadto sa mga bakwit nga sentrong naapektuhan sa paglutos sa militar sa mga terorista. EEF