DUNAY madawat nga silot sanglit gipakusgan na karon sa kapulisan ang ilang pamaagi aron masikop ang mga kriminal.

Si Davao City Police Office director Senior Superintendent Alexander Tagum nagpagaws sa maong bahad Huwebes, Mayo 24, luyo sa sunod-sunod nga pagpanulis sa dakbayan sa miaging mga adlaw.

Ang direktor nagkanayon nga siya nagmandu na sa tanang station commanders nga pakusgan ang ilang paningkamot nga masulbad ang krimen sa ilang area of responsibility.

Si Tagum nagkanayon nga nasikop na nila ang pipila ka mga suspek samtang ang uban padayon nilang gipanid-an.

Base sa ilang rekord gikan Enero hangtud Disyembre 2017, dunay pag-ubos sa kasong kawat sa 200 kompara sa samang period sa miaging tuig nga dunay 337.

“We will stop them by all means,” suma ni Tagum.

Siya nagkanayon nga ning tuiga, dunay walo ka mga suspek ang napatay tungod misukol sa kapulisan.

Sa miaging semana, duha ka babaye ang nabiktima sa mga tulisan samtang usa kanila ang nasamdan sud sa burger stall diin siya nagtrabaho Barangay Catalunan Pequeno, Davao City.

Mga suspek, kinsa nakatangag sa P7,000 nga koleksyon sa biktima, padayon pang gipangita sa kapulisan.

Sa laing insidene, nabiktima ang saleslady samtang pauli sa ilang balay, kinsa nakuhaan og cellphone ug salapi nga P300.

Hinuon, ang suspek nasikop sa kapulisan niadtong Lunes, Mayo 21, human positibo siyang giila sa biktima.