COTABATO CITY -- Gisiguro ni Presidential Peace Adviser Carlito Galvez nga muagi sa hugtanon nga proseso ang decommissioning alang sa mga manggugubat sa Moro Islamic Liberation Front (MILF).

Muabot sa 12,000 nga mga manggugubat sa MILF ang ipa-ilawom sa maong proseso.

Gawas sa pagsurender sa mga armas muagi sab kini sa mga seminar ug mga aktibidad nga mahimong giya sa matag usa sa pagsubay sa malinawong pagpuyo.

Sumala kang Bangsamoro chief minister Alhaj Murad Ebrahim nga ila na nga gisumite ang listahan sa mga MILF fighters ug sa mga armas nga gigamit niini.

Kini nagpresentar sa 30 ka porsyento sa kinatibuk-ang ihap sa puwersa sa MILF ug tulo ka hugna sa “gradual decommissioning process.”

Una nga giplano sa gobyerno nga kadtong mga batan-on ug mga kwalipikado nga manggugubat sa MILF puwede nga ipailawom sa integration program sa militar susama sa MNLF.

Kadto sab nga idaran na o tigulang tagaan sila og livelihood assistance sa panguma, kooperatiba ug uban nga proyekto nga gusto nila.

Gipangandaman na karon sa MILF ug gobyerno ang sunod nga decommissioning process.