MAGSAYSAY, Davao del Sur -- Nasapon sa mga sakop sa Magsaysay Municipal Police Station ang lalaking nag-atubang og kasong frustrated murder ug gikonsidera nga number 4 most wanted sa lungsod.

Nakig-alayon ang kapulisan sa lungsod sa mga sakop sa Provincial Intelligence Unit (PIU), Criminal Investigation and Detection Group (CIDG) sa pagsilbi sa orden de aresto sa suspek nga nasiplatan sa Purok Lower A, Barangay Tamugan, Marilog District, Davao City, alas 11:30 sa buntag, Lunes, Oktubre 12.

Si Major Jeffmar Tercero, hepe sa Magsaysay Police Station, nag-ila sa dinakpan nga mao si Ramon Rama Alfeche, 30, minyo, construction worker ug molupyo sa Purok 2, Barangay Upper Bala.

Sumala ni Tercero nga Disyembre 1, 2014 dihang gipagawas sa korte ang warrant of arrest sa suspek mao nga taudtaod na kining gipangita human misibat.

Dihang natultulan ang gitagoan niini, abtik nga giambakan sa kapulisan ang suspek mao nga nagtingkagol na kini sa prisohan.

Hinuon, mahimo pang makaangkon og temporaryong kagawasan ang suspek sa piyansa nga kantidad og P200,000 ngadto sa korte. (Orlando B. Dinoy)