GATUSAN ka mga motorista ang gidakop sa lokal nga panggamhanan sa Siyudad sa Davao tungod sa paggamit ug pagbabag sa mga bike lanes.

Si City Transport and Traffic Management Office (CTTMO) Head Dionisio Abude nagkanayon nga moabot sa 156 indibiduwal ang nadakpan sa pag-ali o ilegalnga nagparada sa mga bike lanes sukad gipatuman ang silot sa mga mosupak niadtong Mayo karong tuiga.

Samtang 45 ka masinupakon sab ang nadakpan ug gimultahan gikan Hunyo 12 hangtud 19.

Dugang ni Abude nga mga drayber sa sakyanan kinsa ilegal nga nagparada sa mga bike lanes gikasohan og ilegal nga parking ug gipamulta og P500. Gawas niini, kasohan sab sila og "disregarding traffic signs."

Matud sa opisyal nga ang maong pagdakop magsilbi isip pahimangno ngadto sa mga motorista dinhi sa siyudad.

Kasamtangan ang Konseho ning siyudad nagrebisar sa mga probisyon sa Bicycle Ordinance. Kon mapatuman na, mga masinupakon multahan og P1,000.

Naglaum si Abude alang sa dinaliang pagpasar sa modified ordinance alang sa dugang espisipikong sumbanan sa bike lanes sa dakbayan.

Ang maong gisugyot nga ordinansa mopailawom pa og usa pa ka pagdungog sa komite una kini iduso ngadto sa plenaryo alang sa deliberasyon. (Ralph Lawrence G. Llemit)