WA NA mahatagi og higayon nga mabuhi ang usa ka traysikel drayber human nga gipusil alas 11 sa gabii niadtong Huwebes, Nobyembre 8 sa Kidapawan City.

Giila ang biktima nga si Ramonito Quibol Panilag, 33, ug molupyo sa Purok Guava, Barangay Poblacion, Kidapawan City.

Matud ni Kidapawan City Chief of Police, Superintendemt Ramel Hojilla nga naghatud lamang og pasahero ang biktima sa Quezon Boulevard sa dakbayan.

Apan sa diha nga nakanaug na ang pasahero gikan sa traysikel, kalit siyang giduol sa duha ka wala mailhing lalaki, dayong pusil.

Patay gilayon ang biktima human maigo sa ulo ug likod sa lawas, samtang mga mamumuno daling miikyas.

Gihulagway nga way nakaila sa mga suspek gumikan kay nakataptap og panyo ang ilang dagway.

Hangtud sa pagsuwat ning balita, blangko pa ang mga awtoridad sa motibo sa pagpatay sa biktima. (Edgar E. Fuerzas)