DAW eksena sa sikat nga teleserye ang natigayong ginukdanay sa kapulisan ug Task Force (TF) Davao batok sa usa ka suspek nga nagdumili sa pagpa-inspeksiyon dihang miagi kini sa TF-Davao Checkpoint sa Licanan, Bunawan, Davao City Martes sa buntag, Oktubre 12.

Sa inisyal nga report gikan sa Davao City Police Office, giila ang suspek nga usa ka Roy Conrad Tabacon Calzada, 39-anyos, minyo, negusyante ug nagpuyo sa Barangay Mankilam, Tagum City.

Gimaneho sa suspek ang usa ka SUV Geely CoolRay, kolor puti, kinsa nasikop sa mga personahe sa Task Force Davao ug Bunawan police human sa pipila ka minutos nga ginukdanay ug misangko sa usa ka gasolinahan sa Kilometro 22, Barangay Bunawan, Davao City.

Nasayran nga nagdumili ang suspek dihang inspeksiyonon na unta kini hinungdan nga nagpaturatoy kini'g padagan.

Una niini, nataho ang giingong naay pinusilay sa National Highway sa Licanan, Bunawan, Davao City nga gikalisang sa mga motorista.

Nakuha sa posisyon sa dinakpan ang lima ka gramos nga gituohang shabu ug samdan sab kini.

Anaa na sa kustodiya sa kapulisan sa Bunawan Police Station sa Davao City ang suspek kinsa mag-atubang og mga kaso didto sa korte.