NAKASIKOP na sab og laing nagpahimulos sa pagpataas sa presyo sa Ethyl alcohol ang Davao City Police Office (DCPO) atol sa ilang gilusad nga buy-bust operation alas 2:35 sa hapon niadtong Huwebes, April 2, didto sa Guzman Street, Barangay 14-B, Davao City.

Ang suspetsado nailhang si Prince Samama Caracol, 25 anyos, minyo ug residente sa No. 5, Emerald Street, Ecoland Phase 4, Talomo, siyudad sa Davao.

Mismong ang Special Operation Group (SOG) sa DCPO ang mihimo sa operasyon human ilang nadawat ang impormasyon gikan sa kasaligan nga impormante.

Dihang nagpositibo nga mobaligya ang suspek og Ethyl alcohol, gilayong giambakan sa kapulisan ug giandam ang marked money.

Sa lugar sa operasyon, gilayong gitunol sa nagtakuban nga pulis ang kuno salapi nga bayad sa gi-order niini nga ethyl alcohol, ug dihang sa pagdawat, dali kining giposasan.

Moihap sa 34 ka mga galloon nga dunay tag 4000ml Ethyl alcohol 70 percent solution nga moabot sa P28,900 ang nakuha sa posisyon sa dinakpan lakip na ang usa ka Suzuki Multi Cab kolor itom, ug usa ka iPhone 6.

Gibalhog na sa selda ang suspek samtang giandam ang kaso nga ipasaka kaniya didto sa korte. (Jeepy P. Compio)