PADAYONG gipangita sa kapulisan sa Sasa Police Station ang anak sa tag-iya sa balay nga mitago sa giingong chemical nga mihungaw niadtong Lunes.

Kini ang gibutyag ni Davao City Police Office spokesperson Senior Inspector Ma. Theresita Plaza-Gaspan human ma-turnover sa Environment Management Bureau (EMB) ang mga nakumpiska nga chemical didto sa Purok Sto. Niño, Riverside, Kilometro 9, Barangay Sasa, Davao City, Lunes sa gabii.

"So far, at large pa ang anak nga alleged nga nag-keep sa chemicals ug ongoing pa ang gihimo nga imbestigasyon sa Sasa PNP labot sa hitabo," ingon ni Gaspan.

Kahinumdoman nga naukay ang mga residente dihang dunay gikataho nga chemical leak sa ilang lugar diin moihap sa 42 ka mga residente ang gipangdala sa ospital kay naglisod og ginhawa human ilang napanimahoan ang kemikal.

Alas 5 sa buntag niadtong Lunes napanimahoan na ang chemical sa balay ni Cosme Sanchez partikular sud sa kwarto sa iyang anak nga si Regil Daya, alyas Duco, 23.

Nakuha gikan sa maong lawak ang tunga sa sako nga dunay 1 liter ug 500 ml nga botelya sa insecticides nga gilubong mga usa ka piye ang gilawmon.

Sumala ni Gaspan nga maayo na ang kahimtang sa mga pasyente nga nadala sa ospital ug ang kadaghanan kanila nakauli na sa ilang balay.