GISUBAY karon sa kapulisan sa Sta. Ana Police Station kinsa ang mag-partner nga sakay sa Navarra pick-up nga mipaturatoy lang og padagan pagawas sa usa ka lodging inn nga wala mibayad.

Usa ka Jaymark Bantelan Mocali, 27-anyos, security guard sa usa ka inn sa Dacudao Avenue, Barangay Paciano Bangoy, Davao City ang mipatim-aw sa Sta. Ana PNP ug nagpa-blotter sa hitabo.

Saysay sa guwardiya nga dali siyang gisultihan sa roomboy sa maong inn dihang paspas nga nigawas ang Navarra pick-up nga alegasyong wala kabayad human nigamit og lawak ala 1 sa kaadlawon niadtong Biyernes, Septyembre 20.

Una niini, alas 11 sa gabii, Huwebes mi-check-in ang lalaki ug babaye sa usa sa mga room sa maong inn diin gituohang posible nga nagtariki ang duha ug pagkahuman kalit na lamang silang nanakay sa ilang sakyanan ug wala na miagi sa cashier.

Bisan og dunay guwardiya, wala nila mapugngi ang kalit nga paggawas sa pick-up sa ilang establisemento.

Gisubay na lang karon sa General Investigation Section sa Sta. Ana PNP kung kinsay tag-iya sa maong pick-up human nakuha ang plate number niini.

Posibleng mag-atubang og kaso ang duruha nga mi-check-in nga wala mibayad.