BUNGKAG ang lawas sa mag-uuma nga nabuthan og bomba alas 5:15 sa hapon Miyerkules, Septiyembre 13, 2020, didto sa General Salipada K. Pindatun (GSKP), Maguindanao Province.

Giila ang biktima nga si Yasser Guialudin, 28, minyo ug molupyo sa Sitio Gantong, Barangay Tunggol sa nahisgutang lungsod.

Gibutyag ni GSKP Chief of Police Captain Radzak Musa nga nagkuha lang ang biktima sa gitugway niyang kabaw duol sa basakan unahan lamang sa iyang gipuy-an apan aksidente nga natamakan ni Guialudin ang improvised explosive device (IED) ug mibusikad.

Patay on the spot ang mag-uuma nga natusak-tusak ang lawas sa mga tipaka sa bomba.

Sa diha nga nagresponde ang mga sundalo ug pulis, narekober ang lain pang usa ka IED nga wala pa makabuto ug dali nilang gidepyos.

Nasayran nga sa wala pa ang hitabo, dunay ipahigayon unta nga pagsurbey sa yuta nga giawayan sa Barangay Tunggol, utlanan sa Barangay Kulasi sa GSKP.

Padayon pang gisusi sa kapulisan sa General Salipada Municipal Police Station ang panghitabo.