PANABO CITY, Davao del Norte - Swerte nga wa maigo sa mga bala ang usa ka negosyante nga gipaulanan og mga bala sa wala mailhing mga armado sa Purok 2, Brgy. Salvacion alas 6:00 sa gabii, Biyernes, Disyembre 13, 2019.

Ang biktima giila nga si Ruel Sacote Seladez, 47-anyos, minyo ug molupyo sa Purok 2, Brgy. Salvacion.

Sa report nga nakuha gikan sa Davao del Norte Provincial Police Office nasayran nga ang biktima personal nga midangat sa Panabo City Police Station ug mitaho nga siya gipusil sa duha ka wala mailhing mga armado.

Base sa inisyal nga imbestigasyon, ang biktima naglabigar sa dalan gikan sa Quarry Site sa Brgy. Kasilak sakay sa gimanehong kolor Gray Hyundai Terracan nga adunay plaka nga LNK 534 apan pag-abot sa dapit diin nahitabo ang insidente, ang biktima mikanaug sa gisakyang sakyanan aron mangihi dihang gipusil sa makaupat nga higayon sa duha ka wala mailhing mga armado nga nag-angkasan sa kolor pula Honda XRM motorcycle.

Ang biktima wa maigo apan ang tuong bahin sa kilid sa gimanehong sakyanan maoy naigo sa mga bala.

Samtang ang mga suspek human sa gihimong pagpamusil daling nangagiw palayo paingon sa direksyon sa Brgy. Kasilak.

Wa'y narekober nga mga basiyo sa bala ang kapulisan gikan sa crime scene.

Motibo sa krimen lakip ang matuod nga bansagon sa mga suspek padayon pa karong gisusi sa kapulisan sanglit nagpadayon pa ang ilang imbestigasyon. Dexter T. Visitacion