NABUNTURAN, ComVal Province -- Sikop ang gikonsiderang number 8 drug pusher sa Compostela Valley Province human nakuhaan og shabu atol sa gipahigayong drug bust, sa Purok 5, Barangay Poblacion, alas 5:55 sa hapon, Biyernes, Enero 18.

Ang suspek giila sa kapulisan nga si Deo Junn Logronio, 33, kinsa nakuhaan og upat ka pakite sa gituohang shabu dihang gi-drug bust sa hiniusang puwersa sa Philippine Drug Enforcement Agency (PDEA), Provincial Intelligence Branch Compostela Valley Police Provincial Office ug Nabunturan Municipal Police Station.

Segun sa taho sa kapulisan ang suspek maoy number 8 sa Top 10 drug priority target list sa Compostela Valley.

Pipila ka mga ahente ang nagtakuban nga mopalit og droga ang nakigtransaksyon sa suspek gamit ang P3,000 nga markadong salapi.

Dihang natunol na ang droga bugti sa salapi gilayong giposasan ang suspek.

Narekober gikan sa posisyon sa dinakpan ang usa ka dakong pakite sa shabu ug lakip sa narekober ang tulo ka medium size.

Ang dinakpan balhog na sa prisohan kinsa pasakaan sa kasong pagsupak sa Republic Act 9165 kon Comprehensive Dangerous Drugs Act of 2002 didto sa korte. (Rockyben S. Catisay)