CENTRAL MINDANAO--Subling gipatuman sa otoridad sa Siyudad sa Cotabato ang “No ID, No Entry.”

Kini ang direktiba sa bag-ong milingkod nga Philippine National Police City Director nga si Police Colonel Potria Manalad nga mihulip kang Police Colonel Michael Lebanan.

Ang “No ID No Entry” sa Siyudad sa Cotabato aprobado sab ni Mayor Attorney Frances Cynthia Guiani Sayadi ug mga miyembro sa City Council.

Suportado sab sa Joint Task Force Kutawato ang “No ID, No Entry” sa Siyudad Cotabato nga gipaboran ni 6th Infantry (Kampilan) Division Chief, Major General Cirilito Sobejana.

Tumong niini nga mapahapsay pa ang seguridad sa Dakbayan sa Cotabato batok sa hulga sa mga dautang pundok.

Sunod-sunod ang mga dagkong kremin nga natigayon sa Siyudad sa Cotabato nga gikabalaka ni Mayor Cynthia Guiani Sayadi.

Una na nga gipatuman sa Siyudad sa Cotabato ang “No ID, No Entry” niadtong tuig 2018 diin miubos ang nagkadaiyang kremin.

Gihangyo kadtong buot mosulod sa Cotabato City nga magdala og ID aron dili sila magkaproblema o kaha matanggong sa kuwerpo sa kapulisan.