STA. CRUZ, Davao del Sur -- Nagtagbo ang grupo sa komunistang New People's Army (NPA) ug 39th Infantry Battalion (IB) didto sa Sitio Garok, Barangay Sibulan, alas 3:45 sa hapon, Dominggo, Septyembre 13.

Sumala ni Lieutenant Colonel Geoffrey Carandang, pamuno sa 39th IB, nga anaa sa kapin kun kulang 20 ka mga rebelde ang na-engkwentro sa ilang tropa.

Nasayran nga mga sakop kini ni Roberto Castillote, alyas Kumander Inoy/Solomon sa Sentro de Grabidad, Pulang Bagani Command, Southern Regional Committee sa NPA.

Nahitabo ang pagbinayloay og mga bala human mitaho ang mga residente sa lugar kalabot sa presensya sa mga walhong komunista, hinungdan nga nakaresponde gilayon ang kasundaluhan.

Sa kasamtangan, di pa masulti sa militar kung aduna'y mga rebeldeng namatay o naangol sa gyera sanglit nagpadayon ang ilang clearing operation sa pagsuwat ning balita. (Orlando B. Dinoy)