MILUSAD og "drilling and pressure testing" sa oil and gas deposits ang Sultan Kudarat Liguasan Oil and Gas Corporation (SKLOGC) sa lungsod sa Lambayong, Sultan Kudarat.

Base sa Petroleum Service Contract nga giisyu sa Department of Energy (DOE) ngadto sa SKLOGC, ang nasangpit nga kompaniya mopahigayon og eksplorasyon ug "extraction" sa lana ug gas deposits sa Area 9 sa Cotabato-Basin nga naglakip sa Lambayong.

Sa pagkakaron, ang SKLOGC naghimo og 11 ka oil and gas wells sa Area 9 sa Cotabato-Basin ug unom niini anaa sa Lambayong.

Matud ni Mayor Ferdinand "Andy" Agduma nga ang pagkuha sa lana ug natural gas mao na ang posibleng tubag sa dugay nang gitinguha nga mahimong moderno ang lungsod ug mahaw-as na ang katawhan gikan sa kawad-on.