MAKUTI ug lawom nga imbestigasyon ang gihimo sa Panabo City Police Station labot sa pagpusil-patay sa usa supervisor sa Department of Education (DepEd)-Davao Region ala 1:30 sa hapon niadtong Huwebes didto sa Tadeco Road, Barangay San Francisco, Panabo City.

Ang biktima nailhang si Babito Manliguez, minyo, 58-anyos, ug residente sa Purok 3-B, Barangay San Francisco.

Gawas nga DepEd supervisor ang biktima, giingong usa sab kini ka pastor.

Subay sa inisyal nga imbestigasyon sa Panabo PNP, ang biktima nagmaneho sa iyang kotse padung sa ilang balay, apan pipila ka metros sa ilang panimalay gibanhigan sa mamumuno sakay sa motorsiklo.

Gidala pa ang biktima sa ospital, apan nabugtoan sa kinabuhi.

Lima ka mga basiyo sa bala sa kalibre .45 nga pistola ang narekober sa kapulisan sa crime scene.

Sa social media post, may mga nagsulting ang biktima nalambigit sa money investment scheme, apan duna say mihimakak niini.

Giingon sa mga silingan ug kahigalaan nga usa ka maayong tawo ang gipatay nga pastor diin padayon nilang gisinggit ang hustisya.