DIGOS CITY -- Malampuson ang ordinasyon sa bag-ong obispo sa relihiyong Romano Katoliko diin gipahigayon sud sa Mary Mediatrix Cathedral of All Graces ning dakbayan Lunes, Pebrero 11.

Si Bishop Ronald Lucas, ilado sa tawag nga Fr. Bong, na-ordinahan pagkapari niadtong Abril 7, 1992 ni Bishop Generoso Camiña, D.D., ang labing unang Obispo sa Diocese of Digos.

Human sa 26 ka tuig, ang Vatican mi-anunsyo pinaagi ni Pope Francis nga mahimo nang ikalima nga obispo sa Pagadian, Zamboanga del Sur, niadtong Nobyembre 22, 2018, nga adlaw'ng natawhan ni anhing Bishop Camiña nga maoy nag-ordina sa pagkapari niini.

Si Bishop Lucas mao ang pinakaunang obispo nga gikan mismo sa Diocese ug lumad sa Magsaysay, Davao del Sur.

Mismong kini sab ang nagpili nga Pebrero 11 ang iyang ordinasyon nga kapistahan sa Our Lady of Lourdes.

Sa maong petsa, natukma ang ika-39 ka tuig dihang na-instalar nga obispo si Camiña sa karaang Mary Mediatrix Cathedral mao nga gihulagway kini nga makasaysayon.

Si Bishop Lucas gitugyan ni Bishop Guillermo Afable, ang obispo sa Diocese of Digos, isip main consecrator.

Giduyogan kini nila Most Reverend Martin Jumoad, ang Arsobispo sa Ozamis ug Most Reverend Emmanuel Cabajar, D.D., ang Emeritus sa Diocese of Pagadian.

Ang Santos nga Misa gisaulog ni Reverend Fr. Julius Tonel, ang Obispo sa Ipil, Zamboanga.

Mapasalamaton sab si Senior Superintendent Alan Manibog, police provincial director, sa tanan niining ginsakpan sa hugot nga seguridad human nahimong malinawon ang dakong aktibidad nga napahigayon sa probinsiya.