DIGOS CITY -- Mismong si Presidente Rodrigo Duterte ang mitunol sa tseke nga nagkantidad og P10 milyones isip ayudang pinansyal sa mga biktima sa linog ning lalawigan.

Gitunol ang hinabang atol sa ika-60 anyos nga founding anniversary sa tunghaan niini sa sekondarya nga Cor Jesu College (CJC) pinaagi sa programa nga gipahigayon niadtong Biyernes, Disyembre 27.

Sa pagpamulong sa pamuno sa nasud didto sa CJC Almendras Gym, nakahimo pa kini pagpasiaw kalabot sa linog nga wa siya mahadlok.

Gitataw niini nga natulog siya dihang nahitabo ang kusog nga linog mao nga gidali siya pagpukaw sa iyang nars nga pulis ug mga sakop sa Presidential Security Group (PSG), apan iyang giingnan nga pasagdan lang siya.

“Inakyat ako sa taas sa kwarto ko. Sabi niya, ‘Sir... Sir naglinog.’ Having she really see the house swaying. Sabi ko, ‘Ok lang, bumaba ka lang. Wag mo akong idamay,’” niya pa.

“Unsa ba ning linog nganong gidaug-daog man mo pabalik-balik. Daug-daog na basta in-ana,” asoy niini nga miani og katawa sa publiko.

Apan, seryosong gisultihan niini ngadto sa mga mitambong sa programa nga wa’y makatagna sa linog.

“You know, one thing is very clear to us: we cannot predict earthquakes. So there’s a movement tectonic dito [here] banda sa [Davao del Sur]. You know those big rock, biggest wall, they grind together and because of their movement downstairs they create trouble for us,” ni Duterte.

Sa iyang pag-adto sa M’lang, North Cotabato nianang buntag sa samang adlaw, nangayo sab kini og pasaylo sa mga biktima sa linog nga dugay siyang miadto kanila tungod kay na-busy siya sa kauluhang Manila aron imbestigahan ang problema sa tubig nga gikalambigitan sa mga Ayala ug Pangilinan.

“And in that contract, the Philippines surrendered sovereignty by allowing these concessionaire to control when there should be an increase,” asoy niini.

Gidason ni Duterte nga miulbo ang iyang kasuko sa isyo sa Maynilad. (Orlando B. Dinoy)