PERSONAHE sa Panabo Police padayong gipanubayan ang kasong pagpanulis sa usa ka Intsik, gawas sa usa ka iladong kan-anan sa Panabo City, Mayo 17.

Ang insidente nahitabo mga alas dos sa hapon atubangan sa fastfood chain nga Jollibee sa National Highway, Barangay Gredu, Panabo City.

Nanghuyhoy intawon ang abaga sa biktimang si Liyan Pang, 46 anyos, minyo, negusyante, usa ka Chinese National human makuha gikan niya ang kuwarta nga P3,900,000 milyon.

Sa report sa kapulisan, ang biktimang nanag-iya sa Zaza Agri Ventures, kuyog sa iyang drayber nga si Cristobal Larosa Matondo, ug Rizalyn Alameda, cashier dihang nahitabo ang krimen.

Nasayran nga human sila mangaon sa maong kan-anan, miguwa sila padung sa ilang sakyanan, apan sa kalit lang may duha ka wa mailhing lalaki ang mitutok kanila og armas.

Pugsanong gikuha sa duha ka lalaki ang gray Adidas pack bag sa biktima nga sulod ang nahisgutang kantidad.

Human sa hitabo, mga suspek, misibat sakay sa itom nga Bajaj motorcycle nga way plaka.

Kapulisan sa siyudad sa Panabo nagpahimangno sa publiko nga mag-igmat kanunay sa ilang palibot.