DUL-AN napulo ka kilometro ang gilatas sa kapulisan sa Kiblawan Municipal Police Station uban ang laing yunit sa awtoridad sa pag-ibot sa mga tinanom nga marijuana didto sa tulo ka mga sityo sa Barangay Bulol-Salo, Kiblawan, Davao del Sur pasado alas 9 sa buntag, Marso 19, 2022.

Sa report gikan sa Davao del Sur Police Provincial Office (DSPPO), anaa sa 26,000 ka mga punoan sa marijuana diin dungan nga gipangsunog nga gisaksihan sa kadagkoan sa awtoridad.

Sa pagsunog, nisaksi sila Police Lieutenant Colonel Venus Ortuyo, ang deputy provincial director sa DSPPO, ug mismong si Kiblawan Mayor Carl Jason Rama.

Una niini, nakadawat og impormasyon ang awtoridad nga dunay gipangtanum nga mga marijuana sa tulo ka mga sityo hinungdan nga mihimo dayon og pagpanubay ug gikasa ang usa ka operasyon.

Sumala sa kapulisan nga usa lamang ang tag-iya sa mga tinanom nga marijuana diin mokantidad kini sa mokabat kapin kun kulang P5.2 milyon.

Sa milabay nga bulan, si Rama mitunol og P150,000 ngadto sa awtoridad aron dunay magamit atol sa mga operasyon sa pagsumpo sa ilegal nga druga sa dapit.

Ning kasamtangan, ang kapulisan sa Kiblawan uban ang Philippine Drug Enforcement Agency-Davao del Sur naningkamot nga maila ang nananom sa marijuana aron mapasakaan og kaso didto sa korte.