GIPAKLARO sa Land Transportation Regional Office (LTO)-Soccsksargen nga ang paggamit og bonnet sa mga law enforcers sa mga national highways partikular sa Kidapawan City kabahin sa pagsunod sa standard protocol sa pandemic ug heat protection.

Kini mismo ang gibutyag ni LTO-Soccsksargen Regional Director Macario Gonzaga human nakadawat og pagsaway ang ahensiya.

Apan gitin-aw sab niya nga ang importante nga di tabonan sa law enforcer ang ilang identification cards.

Matud sa opisyal nga gidid-an usab ang non-uniform LTO personnel sa pagpanakop ug pag-isyu og Temporary Operator's Permits (TOPs).

Pasidaan ni Gonzaga nga ang operasyon sa buhatan gihimo sa usa ka composite team aron hugtan nga ipatuman ang "No Helmet, No Ride Policy" ug uban pang kalapasan sa trapiko.

Tumong sa LTO-Soccsksargen nga makunhoran ang disgrasiya sa mgaa nagmaneho og motorsiklo.