NAG-TRENDING sa social media ang Facebook post sa usa ka netizen nga nagpakita sa hulagway sa upat ka iring nga daw gipangmasaker, nagkadugo ug wa nay kinabuhi sud sa Villa Alevida Subdivision sa Indangan, Buhangin, dakbayan sa Davao.

Sa post ni Sharon Rose Naval, giingong nakugang kaayo siya human makita ang mga hitsura sa iring sa gawas sa balay sa ilang silingan.

“Mao ni akong nakita sa labas sa balay sa among silingan pag-uli nako karon lang mga 1 a.m. Mga iring murag gi massacre. Mga wai kaluoy! Unta maimbistigahan ni ba. Nanawag nami sa 911 sa barangay daw una mag-report. Kagawad Pinky, ma’am unta ma-investigate ni.”

Sa pakighinabi sa Superbalita Davao kang Naval pinaagi sa Facebook chat, gibutyag niini nga sukad nahitabo kadto sa mga iring niadtong Martes, Disyembre 10, wala pay kasikas nga gihimo ang barangay.

Niya, posibleng anaa ra sa duol ang mihimo sa linuog nga binuhatan sa mga iring nga suma niya nahitabo sab ang sama niini sa nakalabay nga tuig.

“Wala mi strong evidence ma’am, pero duda namo taga diha ra na street [Barcelona St.] kay sa uban street within subdivision wala man. Last year ingon ana gihapon nahitabo sa mga iring.”

Mga netizen nga nagkomento sa post ni Naval napuno sa kapungot ug nagkondena sa kinsa mang mihimo niini sa mga hayop.

Sa pagsuwat ning balita, ang post niya duna nay 3.2K shares.

Subay sa Animal Welfare Act of 1998, silutan ang kinsa mang mopatay, mopalisud, mo-maltrato, moihaw o mo-abandona sa mga hayop, mo-multa og hangtud P100,000 o mapriso ngadto duha ka tuig. (Rhona Goc-ong-Villariasa)