BANGI sa negusyo ang unang gitan-aw sa kapulisan sa anggulo sa pagpusil sa negusyante alas 7:28 kagahapon sa buntag didto sa Mamay Road, Brgy. Angliongto, Davao City.

Si Police Major Reuben Libera, hepe sa Sasa Police Station nag-ila sa biktima nga si Paul Andre Fabian Diaz, 27-anyos, residente sa Brgy. Wilfredo Aquino, Agdao District ning siyudad.

Nasayran nga naghatud sa iyang anak ang biktima dihang gikan na kini sa eskuylahan apan gisundan sa duha ka mga mamumuno nga sakay sa walay plaka nga motosiklo.

"Duha ka unidentified gunmen ang sakay sa motorsiklo, nga maoy atong gitutokan karon sa atong imbestigasyon," tipik sa pakighinabi kang Libera sa mga tigbalita.

Napadagan pa sa biktima ang iyang sakyanan padung sa outpost sa pulis aron makapangayo og tabang hinungdan nga natabang kini og nadala sa ospital.

Padayong gipalawman sa kapulisan ang ilang imbestigasyon sa hitabo. (Jeepy P. Compio)