KIDAPAWAN CITY -- Gihimakak sa mga pamilya sa duha ka giingong nalambigit sa ilegal nga druga nga nanukol sa mga awtoridad hinungdan nga napatay alas 2 sa kaadlawon, Huwebes, Hulyo 23, 2020.

Mga napatay giila nga sila si Mutalib Bulod alyas Thong ug Asty Bulod alyas Mahid, pulos molupyo sa Sitio Gantong, Barangay Manaulanan, Pikit, North Cotabato.

Sa taho gikan sa Cotabato Police Provincial Office nga nagpahigayon og search warrant operation ang Pikit Municipal Police Station ug Philippine Drug Enforcement Agency, uban ang militar sa balay sa mga suspek.

Apan giingong nanukol ang duruha ug nakigpinusilay sa raiding team hinungdan nga napugos sa pagbalos ang puwersa sa kagamhanan.

Narekober gikan sa ilang posisyon ang 20 gramos nga shabu, duha ka kalibre .45 nga pistola, usa ka M16 armalite rifle, usa ka 12 gauge shotgun, 2 ka granada, mga magazines, bala ug drug paraphernalia.