REHAS nga puthaw sa prisohan ang gihimas-himas karon sa nagpailang pari kinsa nasikop samtang namunyag sa buntag niadtong Dominggo.

Ang pagpamunyag gihimo sa Purok 4, Peñaplata, Island Garden City of Samal (Igacos).

Si Police Superintendent Noel Asumen sa Igacos Police Station nag-ila sa suspek nga si Eljune Lumbo, 30, ulitawo ug residente sa Barangay Canaan, Kaputian District, Island Garden City of Samal.

“Amo ni siyang naabtan nga namunyag na sa simbahan,” sulti ni Asumen dihang gitawgan sa Superbalita kagahapon pinaagi sa telepono.

Si Asumen nagkanayon nga ilang gisikop ang suspek human nangayo og police assistance si Fr. Danilo Dotollo sa Immaculate Conception Parish.

“Nanawag si Fr. Dotollo sa amo human siya gipahibalo sa gihimo

sa suspek. Wala siya'y coordination sa simbahan, wala sab siya nailhi ni Fr. Dotollo,” dugang ni Asumen.

Matud ni Asumen, ang suspek miderikta sa mga kaabag sa simbahan dayon nagpaila nga pari.

“Nagtuo sab sila nga pari gayud kay nagsuot man og bisti sa pari. Mao nga ilang gipahibalo si Fr. Dotollo nga: ‘Naa na diay kay proxy, Father?' Mitubag sab si Father, “Wala man!” pagkutlo ni Asumen.

Sa pag-abot sa kapulisan, nagsugod na pagbendita ang suspek sa mga bag-ong building bugti sa salapi mao nga ilang giposasan.

Tungod niini, gipasaka na sa kapulisan ang kasong swindling sa korte batok sa suspek. (AD)