TAGUM CITY, Davao del Norte -- Usa ka peace rally caravan ang matigayon karong Byernes, Enero 14, diin salmutan kini sa mga miyembro sa Coalition Against Privatization of Electric Cooperatives (CAPECs) ug The National Center of Electric Cooperative Consumers (NCECCO) Davao del Norte ug sa Davao de Oro Chapter Inc.

Alas 8 sa buntag, Enero 14, unang ipahigayon ang usa ka Holy Mass sa Queen of Apostles College Seminary (QACS) sa Tagum City, diin sundan kini sa usa ka peace walk gikan sa QACS Seminary hangtud na sa Provincial Capitol.

Usa ka hamubo nga programa ang matigayon atubangan mismo sa Provincial Capital grounds ug gilayong isunod ang motorcade o caravan.

Hinuon, gipaneguro sa kapulisan sa Tagum City nga anaa sila magbantay alang sa pagpadayon sa kahapsay ug kalinaw sa maong peace rally caravan.

Usa kini sa mga programa sa mga electric cooperatives sa pagbabag sa pagpasar sa House Bill 10554, sa pagpalapad sa franchise sa usa ka dakong power company.

Ang munisipalidad sa Talaingod, Asuncion, Kapalong, San Isidro, New Corella, Davao del Norte, ug munisipalidad sa Maco, Davao de Oro nga nalakip sa franchise coverage area sa Northern Davao Electric Cooperative (Nordeco) ang buot sa maong HB nga mabutang sa pagpalapad sa prangkisa sa usa ka dakong power company sa Rehiyon 11.

Usa sab sa mga tumong sa maong peace rally caravan mao ang panawagan ngadto sa mga magbabalaod nga ibasura ang nasampit nga sugyot-balaudnon.

"Sa electric cooperative man gud naa gyud na sa balaod sa kining kuryente nga di gyud na mamahimong maduphan o magunitan sa mga private electric company, natingala lang man ta nganong ing-ani nani karon," ingon ni Marcial Gepolonga, 52-anyos, taga Maco Poblacion, Davao de Oro, nga nahinabi sa Superbalita Davao Huwebes, Enero 13.

Sa bahin sa dakong kompaniya sa elektrisidad sa Davao Region, mag-agad sila sa hukom sa mga magbabalaod unsay kapadulngan sa House Bill 10554 apan sa bahin sa Nordeco magpadayon sila ug ilang ipakigbisog ang kooperatiba nga lig-ong ug dunay epesiyente nga suplay subay sa panginahanglanon sa mga konsumante.