MATI CITY, Davao Oriental -- Balhog na sa prisohan ang giingong peke nga dentista dihang malampuson nga nasikop sa awtoridad sa gilusad nga entrapment operation alas 3:30 sa hapon, Hulyo 11, 2022, didto sa usa ka hotel sa Sitio Madang, Barangay Central, dakbayan sa Mati.

Sa report gikan sa Criminal Investigation and Detection Group (CIDG) Regional Field Unit (RFU) Davao Region, ilang gilusad ang entrapment batok sa nagpailang dentista nga alyas Renz.

Dihang nagpositibo ang paghimo sa giingong dentista og serbisyo sa nagtakuban nga awtoridad, gilayon kining giposasan.

Malampuson siyang nadakpan sa hiniusang puwersa sa CIDG Davao Oriental PFU (lead unit) uban ang Regional Special Operating Team (RSOT) ug ang Mati City Police Station.

Narekober sa awtoridad gikan sa posisyon sa dinakpan ang mga ebidensiya sama sa dental materials nga gilangkuban sa assorted elastics, orthodontic brackets, mouth retractors, ug orthodontic wires, ug daghan pa nga sagad pulos gamit sa orthodontic treatments ug braces.

Sumala sa awtoridad nga illegal practice sa dentistry partikular ang pagpanghimo og mga braces nga walay awtorisasyon gikan sa Philippine Dental Association kun kalapasan sa Republic Act 9484 nga mas nailhang Philippine Dental Act of 2007 ang ipasaka nga kaso sa dinakpan didto sa korte.