BANSALAN, Davao del Sur -- Nasikop sa mga sakop sa Criminal Investigation and Detection Group (CIDG) sa Davao del Sur ang usa ka sakop sa “Sumalinog Swindling Robbery Group” nga nagapamaligya og pekeng gold bars.

Si Police Major Francis Sonza, hepe sa CIDG-Davao del Sur, nag-ila sa dinakpan nga si Ritchel Adoptante, hingkod ang pangedaron ug molupyo sa lungsod sa Sta. Cruz sa nahisgutang probinsiya.

Gibutyag ni Sonza nga usa ka negusyanteng biktima sa suspek ang nangayo og tabang kanila human nga una siyang nakabayad og kantidad P300 mil bugti sa mga gold bars nga baligya sa suspek.

Naglusad dayon og entrapment operation ang CIDG human mobalor sa P10 milyones ang gipangayo sa suspek ngadto sa iyang biktima aron ihatag niini ang mga gold bars.

Atol sa operasyon, migamit ang CIDG og mga gipang-kopya nga salaping tag P1,000, uban sa tinuod nga salapi aron ihatag ang laing bayad nga P150,000 mao nga mikagat sa paon ang suspek.

Narekober gikan sa posisyon sa suspek ang usa ka paltik nga kalibre .38 rebolber, uban ang lima ka buhing bala niini ug 10 ka buok peke nga gold bars nga adunay markang Java Gold Government Property.

Ginasubay sab sa mga awtoridad ang taho nga nadawat nga apil ang suspek sa pagpusil patay sa tighimo og lapida nga si Eugenio Labajo Sr., 57, molupyo sa Sitio Curvada sa miaging semana.

Gikustodiya na sa CIDG ang suspek samtang gihikay ang tukmang kasong batok kaniya ngadto sa korte.