NAA nay person of interest nga gipanid-an karon ang Toril Police Station sa kamatayon sa 6-anyos nga batang lalaki.

Una niini, napuno og dinunggaban ang lawas sa 6-anyos kinsa napalgang patay kilid sa sapa alas 6:45 sa gabii, Marso 4, 2021 didto sa Batulosa, Bangkas Heights, Toril District, Davao City.

Ang Toril Police Station nag-ila sa biktima nga si Kenjay Jainar Gido.

Subay sa inisyal nga imbestigasyon sa Toril Police Station, alas 4 sa hapon nananghid ang biktima sa iyang inahan nga maligo sa ulan, apan wa na kini makauli hinungdan nga nabalaka ang inahan ug ilaha na kining gipangita.

Bisan ang mga silingan, nabalaka ug mitabang na sab sa pagpangita sa biktima.

Alas 6:40 sa gabii napalgang patay ang biktima kilid sa sapa ug dunay mga samad sa ulo ug dunay daghang dinunggaban sa kalawasan.

Sa kasamtangan, ang kapulisan sa Toril police sa pagpanguna ni Police Major Michael Uyanguren naghimo na og makuti nga imbestigasyon sa hitabo aron matumbok ug masikop ang suspetsado. (Jeepy P. Compio)