COTABATO CITY -- Grupo sa Bangsamoro Islamic Freedom Fighters (BIFF) ang gitudlo nga suspek sa pagpamomba alas 8:05 sa gabii niadtong Sabado, Agusto 22, 2020, sa probinsya sa Maguindanao.

Gibutyag ni Maguindanao Police Provincial Director Colonel Arnold Santiago nga mibusikad ang usa ka eksplosibo atbang sa Municipal Police Station ug Municipal Hall sa Shariff Aguak, Maguindanao.

Tungod sa kakusog sa impak sa pagbuto nangabuak ang samin sa munisipyo ug istasyon sa pulis.

Suwerte nga walay naangol sa pagbusikad apan nakamugna kini og tumang kahadlok sa mga sibilyan.

Abtik sab nga miabot ang mga sakop sa Explosive Ordnance Disposal Team sa Philippine National Police ug Philippine Army diin mikomperma nga bala sa M79 grenade launcher ang mibuto.

Dako ang pagtuo ni Shariff Aguak Maguindanao Mayor Engrineer Marop Ampatuan nga posibleng pagpanghasi lamang ang motibo sa pagpabuto sa M79 grenade launcher ilabina nga dunay na-preso nga high profile suspect sa Shariff Aguak Municipal Police Station.

Sa kasamtangan gipalig-on pa ang seguridad palibot sa Shariff Aguak Municipal Police Station samtang nagpadayon ang imbestigasyon sa maong hitabo.