NORTH COTABATO -- Nagpahigayon og post disaster needs assessment ang lokal nga kagamhanan sa Siyudad sa Kidapawan kauban ang Office of the Civil Defense (OCD)-Soccsksargen sa mga dapit nga grabe nga giigo sa milabay nga mga linog.

Tumong niini nga mahibaluan ang kahimtang sa mga pamilya sa komunidad nga giigo sa linog alang sa dugang nilang hinabang.

Ang tumong sa Post Disaster Needs Assessment (PDNA) nga lakang sa Kidapawan City mao ang mabalik sa normal ang panginabuhi sa mga apektadong pamilya sa linog ug maayo ang mga naguba nga mga istraktura.

Katambayayong sa lokal nga kagamhanan sa siyudad ug OCD- Soccsksargen ang National Disaster Risk Reduction and Management Council (NDRRMC).

Gipahibalo sa OCD ang kamahinungdanon sa PDNA subay sa probisyon sa Republic Act (RA) 10-121 o DRRM Law.

Ang mga barangay nga gibisita sa Siyudad sa Kidapawan nga gipailawom sa PDNA mao ang Ilomavis, Balabag, Perez ug Poblacion.

Ang taho sa PDNA sa Kidapawan City isumitir sa buhatan ni Presidente Rodrigo Duterte.

Prayoridad sa lokal nga kagamhanan sa dakbayan nga matabangan nga makabangon ang mga pamilya nga biktima sa linog.

Giklaro ni Kidapawan City Mayor Joseph Evangelista nga nag-una nilang prayoridad mao ang pagtukod og relocation sites nga mag-silbi nga bag-o nga pinuy-anan ug komunidad sa mga pamilya nga giguba ug nawad-an sa panimalay gumikan sa linog.