HUGOT karon ang seguridad nga gipatuman sa Davao Oriental Provincial Rehabilitation and Reformatory Center sa Mati City human gisulong sa gibana-banang 25 ka mga armado nga gituohang mga sakop sa Pinatikan Religious Group alas 2:40 sa hapon niadtong Sabado, Agusto 14, 2021, didto sa Purok Maligaya, Barangay Sainz.

Subay sa spot report sa Mati City Police Station, nasayran nga pugsanon nga gisulod sa mga armado ang provincial jail aron nga luwason ang ilang usa ka kauban nga nadetinar kinsa nag-atubang og kasong paglapas sa Presidential Decree 1866 ug kalapasan sa Republic Act 9165.

Nadala gayod sa mga armado ang ilang unom ka mga kaubanan, apan usa kanila ang napatay human nga napusilan sa mga jail guards.

Hugot nga checkpoint ug manhunt operation ang gihimo karon sa kapulisan ug kasundalohan aron masikop pagbalik ang mga pugante ug ang mga responsable sa pagsulong.

Ang Bureau of Jail Management and Penology Davao Region mihimo na og makuting imbestigasyon sa hitabo.