USA ka aktibo nga opisyal sa kapulisan sa Davao City, kinsa hagbay rang giukoy tungod sa giingong tigsuplay og ilegal nga druga, nasikop sa buy-bust niadtong Biyernes, Enero 24, sa Tigatto, Davao City.

Si Police Regional Office (PRO)-Davao regional director Police Brigadier General Filmore Escobal giila ang maong pulis nga si Police Senior Master Sergeant Shiela Laturgo Bande, 43, minyo ug aktibong sakop sa Philippine National Police (PNP) nga kasamtangang nadestino sa Philippine Bomb Information Center ug molupyo sa Block 5, Lot 1, Luis Street, Victory Valley, Tigatto.

"Ang pagkahuli kay PSMS Bande ay nagpapakita lamang na intensibo ang aming enforcement against illegal drugs at internal cleansing sa mga 'anay' sa aming hanay," butyag ni Escobal.

Sumala sa mga operatiba sa kapulisan, si Bande giila nga drug suspect kinsa kanhi na nadakpan sa mga awtoridad isip usa sa ilang supplier.

Human masayri ang impormasyon, si Bande dugay nang giukoy una gilusad ang buy-bust.

"Her assignment with the Directorate of Intelligence made her a hard target for the said operation; yet, the perseverance of our police and PDEA operatives paid off," matud sa PRO-Davao.

Dugang ni Escobal nga ang pagkasikop kang Bande magsilbing pasidaan sa uban pang pulis kinsa nalambigit sa illegal drugs. Dugang ni Escobal nga ila pang pahugtan ang ilang "internal cleansing" batok sa mga badlungon nga pulis.

Base sa taho sa Criminal Investigation and Detection Group (CIDG), ang suspek pinaagi sa entrapment operation human siya nalambigit sa pagmaligya og druga ngadto sa pulis kinsa nagpakaaron-ingnon nga mopalit nga niresulta ngadto sa iyang pagkadakop.

Mga nasakmit gikan sa posisyon sa suspek mao ang usa ka rectangular nga porma sa transparent sachet nga adunay gituohang shabu; duha ka kuwadradong porma sa transparent plastic sachet nga dunay sulod sa gituohang shabu; ug P1,000.