DAVAO DEL NORTE -- Patay ang usa rider human gipusil sa wala maihing mga armado sa Purok 11, Barangay San Miguel, siyudad sa Tagum, alas 6:15 sa Byernes sa buntag, Agosto 7, 2020.

Ang biktima giila nga si Felixberto Nunez Lajera, 37, dunay kapuyo, driver/rider sa J and P courier ug molupyo sa RTU Apokon, Tagum City.

Base sa inisyal nga imbestigasyon, nasayran nga padulong ang biktima maghatud sa iyang ugangang lalaki sa Purok 9, Barangay San Miguel.

Apan pagliko nila sa Barangay Canocotan, nabantayan sa biktima nga dunay nagsunod kanila nga kolor itom nga Suzuki Raider nga dunay duha ka mga sakay.

Kalit gibabagan sa duha ka mga suspek ang gimaneho nga motor sa biktima ug gipusil kini sa makaduha ka higayon nga miresulta sa pagkabalintong sa motor sa dalan.

Dugang sa taho, nga duna pay laing kolor itom nga Suzuki Raider nga miabot sakay ang lain pang duha pa ka suspek ug gitiwasan pagpusil ang biktima tumong sa nagkadaiyang parte sa lawas.

Human sa gihimong pagpamusil, ang mga suspek nagdaling mipalayo paingon sa wala masayring direksiyon.

Wala hinuon maunsa ang ugangan sa biktima atol sa hitabo.

Dugang imbestigasyon gilusad sa kapulisan sa Tagum City Police Station aron nga mailhan ug madakpan ang mga suspek. (Dexter T. Visitacion)