NANGHINAUT ang pamunoan sa Davao City Police Office (DCPO) nga dili na madugangan ang magpositibo nga mga pulis human gipahigayon ang random swab testing sa mga miyembro niini niadtong Miyerkules, Hulyo 15, 2020.

Kini ang gibutyag ni DCPO spokesperson Captain Rosario Aguilar human naka-lockdown ang tibuok DCPO headquarters dihang migula ang resulta nga positibo sa coronavirus disease (Covid-19) ang usa ka miyembro sa Special Weapons and Tactics (Swat).

"Unta wala nay madugang aron hitsas kaayo ang team sa DCPO sa pagbantay sa atong palibot sa pagpatuman sa mga balaod sa pagbatok nato sa Covid-19," ingon ni Captain Aguilar human napahigayon ang random swab testing niadtong Miyerkules.

Giingon ni Aguilar nga usa ka 30 anyos ang pulis nga nagka-Covid kinsa nadestino isip roving patroller sud sa Barangay 23-C, Isla Verde, ang barangay nga gipaubos sa hard lockdown ning mga panahona gumikan sa pagdayong pagtaas sa kaso sa Covid-19.

Nasayran nga niadtong Huwebes, Hulyo 9, ang pulis mireklamo nga lain ang iyang pamatyag sa lawas kinsa gilayong mipaubos sa Rapid Diagnostic Test (RDT) diin negatibo ang resulta.

Hulyo 11, Sabado, na-admit kini sa Brokenshire Hospital gumikan sa taas nga kalintura ug ubos nga count sa platelet apan gibalhin kini sa Southern Philippines Medical Center (SPMC) dihang nasayran nga naka-duty kini sa high-risk area sa Covid.

Sa maong adlaw, alas 5:30 sa hapon, gipaubos kini sa swab test sa SPMC diin pagka-alas 6:30 sa buntag sa Hulyo 14, migula ang resulta nga positibo kini.

"Sa karon, naa siya sa SPMC sa isolation facility," ingon ni Aguilar.

Tungod sa hitabo, gi-lockdown ang DCPO diin ang pag-reles niini og mga travel authority anaa gibutang sa San Pedro Police Station.

Sa kasamtangan, padayon pa nga giobserbahan ang kahimtang sa panglawas sa pulis nga nagpositibo.