MAS gipalapdan karon sa mga kapitan sa Davao City nga nagtukod sa "Run Sara Run Para sa Bayan 2022" ang ilang tumong, di lamang pagdasig kang Mayor Inday Sara Duterte nga mopapili isip pangulo sa nasud, apan iduso sab nila ang kampanya kontra insurhensiya.

Sa press conference adlaw'ng Huwebes, Abril 22, 2021 nga gihimo sa grupo, gisulti nilang di pamolitika ang ilang tumong, apan buot nilang ipasigarbo ug ipaabot sa ubang barangay sa Mindanao unsa ang tumong sa Peace 911 sa siyudad.

Pinaagi sa Peace 911, pipila ka lugar sa siyudad nga giingong gilumluman kaniadto sa rebeldeng grupo giduso ang nagkadaiyang programa alang sa dugang kalamboan niini.

Gibutyag sab ni Alimodin "Wating" Usman, kapitan sa Barangay 23-C sa Davao City nga masunod gayod ang sa ilang grupo ang mga health protocols, magbahin silang mga miyembro sa pagbiyahe sa nagkadaiyang dapit sa Mindanao.

Gimugna ni Mayor Duterte ang Peace 911 isip tulay aron matugkad ang ugat sa insurhensiya sa Paquibato District.

Uban sa kamugnaan niini ang pagbitbit sa mga government services lakip na livelihood programs sa mga tawo sa matag dapit ning siyudad.

Ang Peace 911 gilusad sa siyudad niadtong 2018. (Jeepy P. Compio)