PIPILA sa mga molupyo sa Davao de Oro ang nagplanong sayo bisitahon ang mga minahal sa kinabuhi nga mipanaw na isip kabahin sa pagsaulog sa Todos Los Santos kun Kalag- Kalag.

Kini human masayri ang pagsirado sa mga publikong sementeryo sa tibuok nasud sugod Oktubre 29, 2020 hangtud Nobyembre 4, 2020 agi’g pagsunod sa mando sa National Inter- Agency Task Force ug sa local Task Force against Covid-19 nga gidili ang mga panagtapok o mass gathering aron malikayan ang pagkuyanap sa Covid-19.

Ang biyuda nga si Trinidad , 67, nga nahinabi sa SunStar Superbalita sulod sa publikong sementeryo sa lungsod sa Compostela, nagbutyag nga iyang gisusi og sayo ang lubnganan sa mipanaw na niyang kapikas sa kinabuhi mintras halayo pa ang Kalag-Kalag aron nga maseguro nga sa maong adlaw, nindot ug limpyo na ang pantiyon sa namatay niyang bana.

Di buot ni Trinidad nga hugaw tan-awon ang lubnganan sa iyang bana kay basin pa kuno kon unsa ikasulti sa iyang mga anak nga atua sa mga lagyong dapit, nanarbaho nga mobisita sab kon makahigayon.

Matud pa nga bisan og wa pa ang Covid-19, naandan na sa biyuda nga sayo manglimpyo sa lubnganan, tungod kay gusto niya nga sa pagduaw sa iyang mga anak di na mamoblema sa pagpanglimpyo.

Samtang ang laing biyuda nga ginganlan og Vanessa, 40, naguol sanglit posibleng di siya makabisita sa lubnganan sa namatay niyang bana ug anak nga atua sa Manila.

Matud pa nga nakasaad si Vanessa nga moadto sa lubong sa iyang bana ug anak nga namatay gumikan sa disgrasya usa ka tuig na ang milabay, apan tungod sa kapit-os ug kalisud sa panahon gumikan ning kasamtangang pandemya, posibleng di matuman ang saad human siya mipauli sa balay sa iyang ginikanan.

Sa higayon nga di gyud makalugsong sa Manila, maoy plano ni Vanessa nga magdagkot og kandila sa simbahan ug mag-ampo pahinungod sa kalag sa duha niya ka mga minahal sa kinabuhi.