SAGUPON sa siyudad sa Davao ang mando sa Inter-Agency Task Force on Covid-19 sa pagpasira sa tanang mga pampubliko ug pribadong sementeryo, lakip columbarium gikan sa Oktubre 29 hangtud sa Nobyembre 4 ning tuiga.

Kini maoy gipahibawo ni Mayor Sara Duterte-Carpio, hinungdan nga iyang gipasidan-an ang Dabawenyos nga mobisita sa mga sementeryo una ug human sa mga nahisgutang petsa.

Ang lokal nga panggamhanan magpagawas og executive order nga nagsagop sa maong kamandoan ug dugang mga guidelines.

Nagpahimangno sab ang mayor nga 30 porsiyento lang sa mga tawo ang gitugtan sa mga sementeryo.

Kahinumdoman nga niadtong miaging semena, nagpasidaan nang daan ug nihangyo sa mga Dabawenyo nga mobisita og sayo sa mga sementeryo karong adlaw sa minatay tungod sa nakaung-ong pagsira niini.

Subay sa pamahayag sa Malacanang, tumong sa pagpasira sa mga sementeryo sa maong mga adlaw aron nga malikayan ang paghuot sa mga tawo ug malikayan ang makamatay nga kagaw sa coronavirus disease (Covid-19).

"Lahat ng mga pribado at pampublikong mga sementeryo at memorial parks ay isasara sa mga bisita mula October 29 hanggang November 4, 2020," pagpahibawo ni Presidential Spokesperson Harry Roque atol sa press briefing didto sa Baguio City.

"Pwede naman po tayo dumalaw bago isara at matapos isara ang mga sementeryo," dugang pa niya.

Dugang ni Roque nga ang temporaryong pagsira sa mga sementeryo sa Kalag-Kalag, tinuig nga tradisyon kon diin minilyon ka mga Pinoy mobisita sa ilang mga mitaliwan na nga mga minahal sa kinabuhi, naaprobahan sa pandemic response task force sa kagamhanan.

Nagpahimangno sab si Roque niadtong buot mobista sa mga sementeryo nga mosul-ob og face mask ug face shield.