MAGSAYSAY, Davao del Sur -- Anaa sa talandugon nga kahimtang sud sa balay tambalanan ang usa ka senior citizen human pusila sa wa pa mailhing mamumuno alas 6:30 sa gabii, Hulyo 30, 2021, didto sa Purok 10, Brgy. Poblacion, Magsaysay.

Ang biktima giila sa kapulisan nga si Tedora Chavez, alyas Dory, nagpuyo sa maong dapit.

Subay sa imbestigasyon sa Magsaysay Municipal Police Station, migula nga niadto sa sapa ang biktima aron kuhaon ang iyang kabaw nga gitugway sa dihang miabot ang usa ka lalaki nga nangutana ngadto kaniya kung ibaligya ba ang iyang kabaw.

Sa pagtubag sa biktima didto na kini gipusil, dayon misibat ang suspetsado.

Daling gidala sa Davao del Sur Provincial Hospital ang biktima kinsa nakahiagom og samad pinusilan sa walang parte sa iyang tiyan.

Gituohan nga personal nga bangi ang nag-unang motibo sa krimen.

Padayon ang gihimong imbestigasyon sa Magsaysay police aron maila ug masikop ang mamumuno. (Jeepy P. Compio)