NABULABOG ang mga jailer ug ubang mga personahe sa Davao City Jail dihang milagubo ang atop sa prisohan ug nahulog ang usa ka bola niadtong Sabado, Hunyo 26, 2021.

Sa pagsusi, ilang nakita nga dunay gisi ang bola ug dunay nakita sa sulod niini nga gibalot og electrical tape.

Sa dihang gi-ablihan, nakita ang unom ka mga pakite sa gituohang shabu.

Sumala sa Bureau of Jail Management and Penology (BJMP) Davao Region nga kasamtangang nagpahigayon sila og imbestigasyon aron mahibal-an kinsa ang responsableng naglabay sa bola ug kinsa ang modawat niini sa sulod sa jail facility.

Anaa na sa kustodiya sa Philippine Drug Enforcement Agency-Davao ang kontrabando.

Padayon nga mag-igmat ang BJMP-Davao sa seguridad nga ilang ginapatuman sa jail facility labi na nga bisan sa ka-istrikto nila naa lamang gihapoy mosuway ug pagpasulod og ilegal nga kontrabando.